ଭୁବନେଶ୍ୱର, ଅକ୍ଟୋବର ୨୮ : ରାଜ୍ୟବ୍ୟାପି ମମିତା ମୃତ୍ୟୁ ମାମଲା ରାଜନୈତିକ ହଇଚଇ ସୃଷ୍ଟି କରିଥିବାବେଳେ ମାମଲାର ମୁଖ୍ୟ ଅଭିଯୁକ୍ତ ଗୋବିନ୍ଦା ସାହୁଙ୍କ ସହ ଘନିଷ୍ଠତା ଅଭିଯୋଗରେ ଗୃହମନ୍ତ୍ରୀ ଦିବ୍ୟା ଶଙ୍କର ମିଶ୍ରଙ୍କୁ ବହିଷ୍କାର ଦାବିରେ ଗୁରୁବାର ଦିନ ୧୨ ଘଣ୍ଟିଆ ସୋନପୁର ବନ୍ଦ ପାଳନ କରୁଛି ବିଜେପି। ଏହି ପ୍ରସଙ୍ଗରେ ଦଳ ସିବିଆଇ ତଦନ୍ତ ଦାବି ଜୋର କରିଛି । ବିରୋଧୀ ଦଳର କର୍ମୀମାନେ ଜିଲ୍ଲାର ସମସ୍ତ ପାଞ୍ଚଟି ବ୍ଲକ, ଦୁଇଟି ଏନଏସି ଏବଂ ଗୋଟିଏ ପୌରପାଳିକା ଅଞ୍ଚଳରେ ବନ୍ଦ ପାଳନ କରିଛନ୍ତି। ସେହିଭଳି ବିଜେପି ନୁଆପଡାରେ ମଧ୍ୟ ବନ୍ଦ ଆହ୍ୱାନ ଦେଇଛନ୍ତି ।
ଏହି ସମୟରେ, ଭାନାଥୀ ଶ୍ରୀନିବାସନଙ୍କ ନେତୃତ୍ୱରେ ଏକ ବିଜେପି କେନ୍ଦ୍ରୀୟ ଦଳ ଅକ୍ଟୋବର ୨୯ ରେ ଓଡିଶା ଗସ୍ତରେ ଆସି ହତ୍ୟା ମାମଲାର ତଦନ୍ତ କରିବେ। ଏହି ଟିମ୍ ଓଡିଶାରୁ ଫେରିବା ପରେ ବିଜେପି ଜାତୀୟ ସଭାପତି ଜେପି ନାଡଡାଙ୍କ ନିକଟରେ ରିପୋର୍ଟ ଦାଖଲ କରିବ। ଏହାରି ମଧୟରେ ରାଜ୍ୟ ବିଜେପି ନେତା ମାନେ ମନ୍ତ୍ରୀଙ୍କ ବହିସ୍କାର ଦାବିକୁ ଜୋରଦାର କରିଛନ୍ତି । ଗତକାଲି ମନ୍ତ୍ରୀଙ୍କୁ ବହିଷ୍କାର ଦାବିରେ ବିଜେପି ଯୁବ ମୋର୍ଚ୍ଚା ସଦସ୍ୟମାନେ ବାଲେଶ୍ୱର ଏସପି କାର୍ଯ୍ୟାଳୟକୁ ଘେରାଉ କରିଥିଲେ।
