ନୂଆଦିଲ୍ଲୀ, ଅଗଷ୍ଟ ୧୨ : ଏକ ସପ୍ତାହ ପରେ ଦିଲ୍ଲୀରେ ପୁଣି ଥରେ ଅମାନବୀୟ ଘଟଣା ଦେଖିବାକୁ ମିଳିଛି । ଏଠାରେ ଜଣେ ୬ ବର୍ଷ ବୟସର ନାବାଳିକାକୁ ଦୁଷ୍କର୍ମ କରାଯାଇଛି । ଏନେଇ ମୟୂର ବିହାର ଥାନାରେ ମାମଲା ରୁଜୁ ହୋଇଛି । ଦୁଷ୍କର୍ମକାରୀ ହେଉଛି ନାବାଳିକାର ପଡ଼ୋଶୀ । ଦିଲ୍ଲୀ ପୋଲିସକୁ ବୁଧବାର ପୂର୍ବାହ୍ନ ୧୧ଟାରେ ଫୋନ ଆସିଥିଲା ଯେ, ୬ ବର୍ଷ ବୟସର ଶିଶୁକନ୍ୟାକୁ ଗୁରୁତର ଅବସ୍ଥାରେ ହସ୍ପିଟାଲରେ ଭର୍ତ୍ତି କରାଯାଇଛି । ହସ୍ପିଟାଲର ରିପୋର୍ଟ ଅନୁସାରେ ସେ ଦୁଷ୍କର୍ମର ଶିକାର ହୋଇଛି । ତ୍ରିଲୋକପୁରୀ ଅଂଚଳରେ ହୋଇଥିବା ଘଟଣା ନେଇ ପୋଲିସ ଜଣେ ଅଭିଯୁକ୍ତକୁ ଅଟକ ରଖି ପଚରାଉଚରା କରୁଛି । ସୂଚନା ଅନୁସାରେ ଗତ ୧ ତାରିଖ ଦିନ ଦିଲ୍ଲୀର କ୍ୟାଣ୍ଟ ଅଂଚଳରେ ଓଲ୍ଡ ନାଗଲ ଗାଁର ଶ୍ମଶାନ ଘାଟର ୪ କର୍ମଚାରୀଙ୍କ ଦ୍ୱାରା ଜଣେ ୯ ବର୍ଷୀୟ ଶିଶୁକନ୍ୟାକୁ କଥିତ ଭାବେ ଦୁଷ୍କର୍ମ ଏବଂ ପରେ ହତ୍ୟା କରାଯାଇଥିଲା । ଦିଲ୍ଲୀ ପୋଲିସ ମୃତ ନାବାଳିକାର ମା’ଙ୍କ ଅଭିଯୋଗ କ୍ରମେ ୪ ଜଣ ଅଭିଯୁକ୍ତଙ୍କ ବିରୋଧରେ ମାମଲା ରୁଜୁ କରି ସେମାନଙ୍କୁ ଗିରଫ କରିଛି ।
