ଭୁବନେଶ୍ବର : ପୁଣି ଜାତୀୟସ୍ତରରେ ଦକ୍ଷିଣୀ ଚଳଚ୍ଚିତ୍ରର ଦବ୍ଦବା ଦେଖିବାକୁ ମିଳିଛି। ଏଥିସହିତ ଦକ୍ଷିଣୀ ଅଭିନେତାଙ୍କ ରାଜ୍ ମଧ୍ୟ ବଳବତ୍ତର ରହିଛି। ଘୋଷଣା ହୋଇଥିବା ୬୮ତମ ଜାତୀୟ ଚଳଚ୍ଚିତ୍ର ପୁରସ୍କାରରୁ ଏହା ପୁଣି ପ୍ରମାଣିତ ହୋଇଛି। ୨୦୨୦ ମସିହା ପାଇଁ ତାମିଲ୍ ଫିଲ୍ମ ‘ସୁରାରାଇ ପୋତ୍ରୁ’ ଶ୍ରେଷ୍ଠ ଚଳଚ୍ଚିତ୍ର ବିବେଚିତ ହୋଇଛି। ବଲିଉଡ୍ ଅଭିନେତା ଅଜୟ ଦେଗବନ ଓ ତାମିଲ ଅଭିନେତା ସୂରୟା ଶ୍ରେଷ୍ଠ ଅଭିନେତା ଯୋଗ୍ୟତା ଅର୍ଜନ କରିଛନ୍ତି। ସେହିଭଳି ତାମିଲ ଅଭିନେତ୍ରୀ ଅପର୍ଣ୍ଣା ବାଲମୁରଲୀଙ୍କୁ ଶ୍ରେଷ୍ଠ ଅଭିନେତ୍ରୀ ଘୋଷଣା କରାଯାଇଛି। ଏଥିସହ ହିନ୍ଦୀ, କନ୍ନଡ଼, ମାଲାୟାଲମ୍, ତାମିଲ, ତେଲୁଗୁ, ହରିୟାନ୍ଭି, ଦିମାସା, ଟୁଲୁ, ମରାଠୀ, ବଙ୍ଗଳା ଓ ଆସାମୀ ଆଦି ୧୧ଟି ଆଞ୍ଚଳିକ ଭାଷାର ଫିଲ୍ମ ଆଞ୍ଚଳିକ ଚଳଚ୍ଚିତ୍ର ବର୍ଗରେ ଶ୍ରେଷ୍ଠ ଚଳଚ୍ଚିତ୍ର ଭାବେ ଜାତୀୟ ପୁରସ୍କାର ପାଇବା ପାଇଁ ମନୋନୀତ ହୋଇଛନ୍ତି। କିନ୍ତୁ ପରିତାପର କଥା ଯେ ମାତ୍ ଖାଇଛି ଓଡ଼ିଆ ଚଳଚ୍ଚିତ୍ର। କୌଣସି ବର୍ଗରେ ବି ଗୋଟିଏ ହେଲେ ଓଡ଼ିଆ ଫିଲ୍ମ ସାମିଲ ହୋଇପାରିଲାନାହିଁ। ୬୭ତମ ଜାତୀୟ ପୁରସ୍କାର ଉତ୍ସବରେ ଦୁଇ ଦୁଇଟି ଓଡ଼ିଆ ଫିଲ୍ମ ଶ୍ରେଷ୍ଠ ଚଳଚ୍ଚିତ୍ର ପୁରସ୍କାର ପାଇଥିବା ବେଳେ ୬୮ତମ ଉତ୍ସବରେ ଗୋଟିଏ ବି ନାଁ ନାହିଁ। ଏମିତିକି କୌଣସି ଅଭିନେତାଙ୍କ ନାଁ ମଧ୍ୟ ପୁରସ୍କାର ତାଲିକାରେ ନାହିଁ।
