ବୁର୍ଲା: ସମ୍ବଲପୁର ବିଶ୍ୱବିଦ୍ୟାଳୟରେ ପୁଣି ଛାତ୍ର ଅଶାନ୍ତି ଦେଖିବାକୁ ମିଳିଛି। ବିଶ୍ୱବିଦ୍ୟାଳୟର ପିଜି ବିଭାଗରେ ଚାରୋଟି ନୂତନ ବିଷୟକୁ ପାଠ୍ୟକ୍ରମରେ ସାମିଲ କରାଯାଇ ଥିବାରୁ ଛାତ୍ରଛାତ୍ରୀ ମାନେ ଏହାକୁ ବିରୋଧ କରି ଆନ୍ଦୋଳନକୁ ଓହ୍ଲାଇ ଥିଲେ। ଏହି ନୂତନ ପାଠ୍ୟକ୍ରମ ଅନ୍ୟ କୌଣସି ବିଶ୍ୱବିଦ୍ୟାଳୟରେ ନ ଥିବା ବେଳେ ସମ୍ବଲପୁର ବିଶ୍ୱବିଦ୍ୟାଳୟରେ କାହିଁକି ଏହି ବିଷୟକୁ ପାଠ୍ୟକ୍ରମ ଅନ୍ତର୍ଭୁକ୍ତ କରାଗଲା ବୋଲି ଛାତ୍ରଛାତ୍ରୀ ମାନେ ପ୍ରଶ୍ନ କରିବା ସହିତ ଏହାକୁ ପାଠ୍ୟକ୍ରମକୁ ବାଦ ଦେବାକୁ ଦାବି କରିଥିଲେ। ଏହାକୁ ନେଇ ସମସ୍ତ ବିଭାଗର ପିଜି ଛାତ୍ରଛାତ୍ରୀ ମାନେ ଶତାଧିକ ସଂଖ୍ୟାରେ ଏକତ୍ରିତ ହୋଇ ପୁରୁଣା ପ୍ରଶାସନିକ କୋଠା ସମ୍ମୁଖରେ ଧାରଣାରେ ବସିଥିଲେ। ଏହାପରେ ବିଶ୍ୱବିଦ୍ୟାଳୟ କୁଳପତି, କୁଳସଚିବ ଏବଂ ପିଜି କାଉନ୍ସିଲ୍ ଅଧ୍ୟକ୍ଷାଙ୍କ ସମେତ ବିଭିନ୍ନ ବିଭାଗର ଅଧ୍ୟାପକ ଅଧ୍ୟାପିକା ଆସି ଛାତ୍ରଛାତ୍ରୀଙ୍କୁ ବୁଝାଶୁଝା କରିବା ପରେ ଆନ୍ଦୋଳନରୁ ଓହରି ଯାଇଥିଲେ। ତେବେ ଏହି ଚାରୋଟି ବିଷୟ ହେଉଛି ମୁକ୍, ଆଇଡିସି, ଇଏସ୍ଡିଏମ୍ ଏବଂ ଇଡି ବୋଲି ସୁଚନା ହସ୍ତଗତ ହୋଇଛି।
