ଭୁବନେଶ୍ୱର: ଅମୃତ ଭାରତ ଷ୍ଟେସନ୍ ଯୋଜନା ଅଧୀନରେ କେନ୍ଦ୍ରୀୟ ଓଡ଼ିଶାର ଷ୍ଟେସନ୍ଗୁଡ଼ିକର ପୁନଃବିକାଶ ଆରମ୍ଭ ହୋଇଛି। ଲକ୍ଷାଧିକ ଲୋକଙ୍କ ଯାତ୍ରା ଅଭିଜ୍ଞତାକୁ ଉନ୍ନତ କରିବା ଏବଂ ଆର୍ଥିକ ବିକାଶ ଓ ଆଞ୍ଚଳିକ ସଂଯୋଗକୁ ବୃଦ୍ଧି କରାଇବା ଲକ୍ଷ୍ୟରେ ଏଭଳି ପଦକ୍ଷେପ ନିଆଯାଇଛି। ଅନୁଗୁଳ, ତାଳଚେର, ତାଳଚେର ରୋଡ୍, ମେରାମଣ୍ଡଳୀ, ଢେଙ୍କାନାଳ ଓ ରେଢ଼ାଖୋଲ ଷ୍ଟେସନ୍ର ଉନ୍ନତୀକରଣ ହେବ। ଯେଉଁଥିରେ ନୂତନ ଷ୍ଟେସନ ଭବନରେ ଉନ୍ନତ ସ୍ଥାପତ୍ୟ, ଆଧୁନିକ ସୁବିଧା ଓ ଉନ୍ନତ ଯାତ୍ରୀ ସେବା ଉପଲବ୍ଧ ହେବ। ଦୃଶ୍ୟମାନ ଓ ସମ୍ମୁଖ ଭାଗ ଚଳପ୍ରଚଳ ପାଇଁ ଉନ୍ନତ ଷ୍ଟେସନ ପ୍ରବେଶ ପଥ, ୧୨ ମିଟର ପ୍ରଶସ୍ତ ଫୁଟ୍ ଓଭର ବ୍ରିଜ, ଯାତ୍ରୀଙ୍କ ପାଇଁ ଲିଫ୍ଟ, ବର୍ଦ୍ଧିତ ଆଶ୍ରୟସ୍ଥଳୀ, ଡିଜିଟାଲ୍ ସାଇନ୍-ଏଜ୍, ସୁରକ୍ଷା ବ୍ୟବସ୍ଥା ସହ ଉନ୍ନତ ପ୍ଲାଟଫର୍ମ, ଆଲୋକୀକରଣ, ଜଳ ସଂରକ୍ଷଣ ଓ ଅପଚୟ ପରିଚାଳନା, ଡ୍ରପ୍-ଅଫ୍/ପିକ୍-ଅପ୍ ଲେନ୍ ଓ ପାର୍କିଂ ସୁବିଧା ରହିବ। ସମନ୍ୱିତ ପରିବହନ ଭିତ୍ତିଭୂମି, ୱାଇଫାଇ, ଏଲ୍ଇଡି କୋଚ୍ ସଙ୍କେତ ବୋର୍ଡ, ଟ୍ରେନ୍ ସୂଚନା ପ୍ରଦର୍ଶନ ଓ ଲାଉଞ୍ଜ କ୍ଷେତ୍ର ଭଳି ଡିଜିଟାଲ୍ ସୁବିଧା ରହିଛି। ଅନୁଗୁଳ ଷ୍ଟେସନ ପାଇଁ ୨୫.୪୧ କୋଟି ଟଙ୍କା ମଞ୍ଜୁର ହୋଇଥିବା ବେଳେ ତାଳଚେର ରୋଡ୍ ଷ୍ଟେସନ ପାଇଁ ୧୮.୮୫ କୋଟି, ତାଳଚେର ଷ୍ଟେସନ ପାଇଁ ୧୨.୯୭ କୋଟି, ମେରାମଣ୍ଡଳୀ ଷ୍ଟେସନ ପାଇଁ ୨୧.୯୯ କୋଟି, ଢେଙ୍କାନାଳ ଷ୍ଟେସନକୁ ୨୬.୧୧ କୋଟି, ରେଢ଼ାଖୋଲ ଷ୍ଟେସନ ପାଇଁ ୨୬.୯୩ କୋଟି ଟଙ୍କା; ଏଭଳି ମୋଟ ୧୩୨ କୋଟି ବ୍ୟୟବରାଦ ହୋଇଛି। ଏହି ଉନ୍ନୟନମୂଳକ କାର୍ଯ୍ୟ କେବଳ ଯାତ୍ରୀଙ୍କ ଯାତାୟାତକୁ ସହଜ କରିବ ନାହିଁ, ବରଂ ନିଯୁକ୍ତି ସୁଯୋଗ ସୃଷ୍ଟି କରିବ। କେନ୍ଦ୍ରୀୟ ଓଡ଼ିଶାରେ ପର୍ଯ୍ୟଟନକୁ ପ୍ରୋତ୍ସାହିତ କରିବ। ଉନ୍ନତ ସଂଯୋଗୀକରଣ ଓ ବ୍ୟବହାରକାରୀ କୈନ୍ଦ୍ରିକ ଡିଜାଇନ୍ ସହ ଏହି ଷ୍ଟେସନଗୁଡ଼ିକ ଆଧୁନିକ ପରିବହନ ହବ୍ ହେବାକୁ ପ୍ରସ୍ତୁତ ହୋଇଛି। ସମୟସୀମା ଅନୁଯାୟୀ ପ୍ରକଳ୍ପଗୁଡ଼ିକ ଶେଷ କରିବାକୁ ଭାରତୀୟ ରେଳବାଇ ନିଷ୍ପତ୍ତି ନେଇଛି।
