ଓଡିଶାର ହକି ପ୍ରେମୀଙ୍କୁ ଏକ ଖୁସି ଖବରରେ ଶୁକ୍ରବାର ଲୋକପ୍ରିୟ ଓଟିଟି ପ୍ଲାଟଫର୍ମ ହଟଷ୍ଟାରରେ ପ୍ରଥମ ଓଡିଆ ଡକ୍ୟୁମେଣ୍ଟାରୀ ‘ମାଉଣ୍ଟେନ୍ ହକି’ ରିଲିଜ ହୋଇଛି। ଡକ୍ୟୁମେଣ୍ଟାରୀଟି ଏକ ନିସ୍ୱାର୍ଥପର ହକି ପ୍ରଶିକ୍ଷକ ରାଜେନ୍ଦ୍ର କୁଜୁରଙ୍କ ସଂଘର୍ଷ ଓ ସଫଳତାର କାହାଣୀ ଉପରେ ଆଧାରିତ। ଯିଏ ସୁନ୍ଦରଗଡ ଜିଲ୍ଲାର ଆମଲିଖାମନର ଏକ ଦୂର ଗ୍ରାମରେ ଗରିବ ଆଦିବାସୀ ଝିଅମାନଙ୍କୁ ଖେଳ ଶିକ୍ଷା ଦେବାରେ ଅନେକ ସଂଘର୍ଷ ଓ ବିରୋଧ ଦେଇ ଗତି କରିଛନ୍ତି । ଏହି ଗାଁରେ ପୁରା ଡକ୍ୟୁମେଣ୍ଟାରୀଟି ସୁଟିଂ କରାଯାଇଛି। ଏହି ଚଳଚ୍ଚିତ୍ରର ମିଳିତ ନିର୍ଦ୍ଦେଶନା ଦେଇଥିବା ଦେବାଶିଷ ମହାପାତ୍ର ଓ ଅବିନାଶ ପ୍ରଧାନ କହିଛନ୍ତି ଯେ ଭୁବନେଶ୍ୱରରେ ହକି ବିଶ୍ୱକପ ୨୦୧୮ର ସଫଳ ଆୟୋଜନ ସମୟରେ ଡକ୍ୟୁମେଣ୍ଟାରୀ ପ୍ରସ୍ତୁତ କରିବାର ଇଚ୍ଛା ମନକୁ ଆସିଥିଲା । ପରେ କୋଚ୍ କୁଜୁରଙ୍କ ହୃଦୟ ବିଦାରକ ଓ ପ୍ରେରଣାଦାୟକ କାହାଣୀ ବିଷୟରେ ଜାଣିବାକୁ ପାଇଲେ ଯାହା ସେମାନେ ନିଜ ଡକ୍ୟୁମେଣ୍ଟାରୀରେ ଚିତ୍ରଣ କରିବାକୁ ନିଷ୍ପତ୍ତି ନେଇଥିଲେ । ସମସ୍ତ ଓଡିଆଙ୍କ ପାଇଁ ଏହା ଏକ ଗର୍ବର ମୁହୂର୍ତ୍ତ ଯେ ପ୍ରଥମ ଥର ପାଇଁ ଏକ ଆନ୍ତର୍ଜାତୀୟ ପ୍ଲାଟଫର୍ମରେ ଓଡିଆ ଭାଷାରେ ଏକ ଡକ୍ୟୁମେଣ୍ଟାରୀ ମୁକ୍ତିଲାଭ କରିଛି। ମୁଁ ରାଜ୍ୟର ସମସ୍ତ ଲୋକଙ୍କୁ ଏହି ଫିଲ୍ମ ଦେଖିବା ଓ ସମର୍ଥନ କରିବାକୁ ଅନୁରୋଧ କରୁଛି ବୋଲି କହିଛନ୍ତି।
