ନୂଆଦିଲ୍ଲୀ, ଡିସେମ୍ବର ୮ : ସାରା ବିଶ୍ୱରେ ବ୍ୟାପୀ ଚାଲିଛି ଓମିକ୍ରନ ସଂକ୍ରମଣ । କୋଭିଡର ସବୁ ଭ୍ୟାରିଆଣ୍ଟ ଠାରୁ ଏହା ହେଉଛି ଅଧିକ ସଂକ୍ରାମକ । ଯଦି ଏହାକୁ ନିୟନ୍ତ୍ରଣ ପାଇଁ ସଠିକ ପଦକ୍ଷେପ ଗ୍ରହଣ କରାନଯାଏ ତେବେ ତୃତୀୟ ଲହର ଆସିଯିବ ବୋଲି ଅଣ୍ଡିଆନ ଲେଡିକାଲ ଆସୋସିଏସନ କହିଛନ୍ତି । ଦେଶରେ ବର୍ତ୍ତମାନ ସୁଦ୍ଧା ୨୩ ଓମିକ୍ରନ ଆକ୍ରାନ୍ତ ଚିହ୍ନଟ ହୋଇଛନ୍ତି । ଏହା ଅଧିକ ବ୍ୟାପୁଥିବା ଏବଂ ଅଧିକରୁ ଅଧିକ ଲୋକଙ୍କୁ ପ୍ରଭାବିତ କରିବ ବୋଲି ବୈଜ୍ଞାନିକମାନେ ମତ ପ୍ରକାଶ କରିଛନ୍ତି । ମାତ୍ର ଭାରତ ସ୍ଥିତି ଏବେ ସ୍ୱାଭାବିକ ରହିଛି । ହେଲେ ଓମିକ୍ରନ ପାଇଁ ଏବେଠୁ ସତର୍କ ହୋଇ ନରହିଲେ ଆଗକୁ ବିପଦ ହୋଇପାରେ । ଏନେଇ ଖୁବ୍ ଶୀଘ୍ର ତୃତୀୟ ଲହର ଦେଖିବାକୁ ପଡିପାରେ ବୋଲି ଆଇଏମଏ ଅଧିକାରୀମାନେ ସାମ୍ବାଦିକ ସମ୍ମିଳନୀରେ ସୂଚନା ଦେଇଛନ୍ତି । ସେପଟେ ଦକ୍ଷିଣ ଆଫ୍ରିକାରେ ପ୍ରଥମ ଚିହ୍ନଟ ହୋଇଥିବା ଓମିକ୍ରନ ଏବେ ୩୪ରୁ ଅଧିକ ରାଷ୍ଟ୍ରକୁ ତାର କାୟା ମେଲାଇବାରେ ଲାଗିଛି । ସେହିପରି ବିଶ୍ୱ ସ୍ୱାସ୍ଥ୍ୟ ସଂଗଠନ ଏହାକୁ ଏକ ଚିନ୍ତାଜନକ ପ୍ରଜାତି ଭାବେ ଘୋଷଣା କରିଛନ୍ତି ।
