କଟକ ୧୯।୨: ଆୟ ବହିର୍ଭୂତ ସମ୍ପତ୍ତି ଠୁଳ ଅଭିଯୋଗରେ ଗିରଫ ହୋଇଥିବା ଅତିରିକ୍ତ ଏସପି ତ୍ରିନାଥ ମିଶ୍ରଙ୍କୁ ଉପଯୁକ୍ତ ସ୍ଵାସ୍ଥ୍ୟ ସେବା ମିଳିବ । ତ୍ରିନାଥଙ୍କୁ ଆବଶ୍ୟକୀୟ ସେବା ଯୋଗାଇଦେବାକୁ ସ୍ବତନ୍ତ୍ର ଭିଜିଲାନ୍ସ ଅଦାଲତ ଜେଲ୍ କର୍ତ୍ତୃପକ୍ଷଙ୍କୁ ନିର୍ଦ୍ଦେଶ ଦେଇଛନ୍ତି । ଜେଲ୍ ଡାକ୍ତରଙ୍କ ପରାମର୍ଶ କ୍ରମେ ତ୍ରିନାଥଙ୍କୁ ଉପଯୁକ୍ତ ସ୍ବାସ୍ଥ୍ୟ ସେବା ଯୋଗାଇ ଦେବାକୁ ଅଦାଲତ କହିଛନ୍ତି । ଭିଜିଲାନ୍ସ ଦ୍ଵାରା ଗିରଫ ହୋଇଥିବା ଏହି କୋଟିପତି ପୋଲିସ ଅଧିକାରୀ ଜଣଙ୍କ ମଧୁମେହ ରୋଗୀ । ଗତ ୧୪ବର୍ଷ ହେଲା ସେ ବିଶେଷ ଚିକିତ୍ସା ପଦ୍ଧତି ଆପଣାଉଛନ୍ତି । ନିୟମିତ ଇନସୁଲିନ ନେଉଛନ୍ତି । ସେ ଗତ ଦେଢ ବର୍ଷ ହେବ ଅବସ୍ଟକ୍ଟିଭ ସ୍ଲିପ ଆପେନିଆ ରୋଗରେ ପୀଡ଼ିତ ଅଛନ୍ତି । ଏଭଳି ରୋଗ ପାଇଁ ସି-ପ୍ୟାକ୍ ମେସିନ ଧରି ନିୟମିତ ଶୋଇବାକୁ ହୋଇଥାଏ । ଏହି ଚିକିତ୍ସା ମଧ୍ୟ ତ୍ରିନାଥ ମିଶ୍ର ନିୟମିତ କରିଥାନ୍ତି । କିନ୍ତୁ ଜେଲ୍ କର୍ତ୍ତୃପକ୍ଷ ଏହି ଚିକିତ୍ସା ପାଇଁ ଅନୁମତି ଦେଇ ନଥିଲେ। ତେଣୁ ତାଙ୍କୁ ହସ୍ପିଟାଲରେ ରଖି ଚିକିତ୍ସା ଯୋଗାଇ ଦେବାକୁ ଭିଜିଲାନ୍ସ କୋର୍ଟରେ ଆବେଦନ କରାଯାଇଥିଲା। ଏହାସହ ତାଙ୍କୁ ଘର ତିଆରି ସ୍ବତନ୍ତ୍ର ଖାଦ୍ୟ ଯୋଗାଇ ଦେବାକୁ ପ୍ରାର୍ଥନା କରାଯାଇଥିଲା।
